達明一派（Audio-Visual)

個Blog Ring度突然間人人都講達明。好！一於人講我又講，講埋一份。

第一次聽達明的歌，怕係黃耀明同李麗珍套戀愛季節的主題曲
《Kiss me Goodbye》。套戲我覺得幾悶（我一向不太愛看愛情片），
但首歌就好正，好想錄0黎聽 -- 我屋企無唱機，播唔到唱片，所以通常
係去舖頭錄歌，兩蚊隻錄一首0甘。八十年代無人有咩知識產權概念，我
電腦軟件也好歌曲也好，都係買老翻的。現在就當然唔會0甘做啦！

Anyway，行過好多地方，都搵唔到呢隊叫達明一派的東西。後尾，有日
放學落九龍城，係龍珠二樓聽到間唱片舖個老細係樹播呢首歌，原來佢地
出了隻EP, 入面收錄了呢首歌。稔都唔稔，同佢買帶dup晒成隻碟了。盒
帶後來搬屋唔見咯，只記得有三四隻歌左右。有首叫乜鬼《愛是能源》仲
係佢兩個同個女仔合唱的，隻歌好普通，但黃耀明的唱工就真係正。

無耐，突然多了好多樂隊出來，有Raidas，太極，Beyond，Fundamental
同達明一派。一時間都唔知邊個打邊個。有回睇無線週日下晝個音樂節目,
每隊Band播一首MTV。當時覺得，太極人多但唔好聽，Raidas麻麻地
（實情若然林夕及姓陳的那個唔係我母校舊生，我都未必會留意呢隊0野），
Beyond算幾好聽但怪雞。（那日播"阿拉伯跳舞女郎"，著到拉登0甘，覺
得好騎呢。）Fundamental就更加唔掂，但唔知點解陳光榮最後跑出。

0甘多隊，只有達明先係正0野。0個日佢地唱《模特兒》，阿達好樣衰但
又好型，阿明留長頭髮好cool，亦唱得好好。當年人人留Matchy頭，佢
個頭真係好掂0下. （年輕的可以問問長輩如PK_大佬，阿古，長毛或者
寶哥哥，就知以當年的吹剪技術及洗頭水質素而能留到呢個髮型，係好
唔簡單的一回事。）

無耐，石頭記及長征都面世了。今次我唔再0甘cheap，買了正版帶咯。
亦由0個時開始，一直聽佢地到家0下。（拆夥後佢地的獨立作品，我
當然都有買啦！）

PS: KISS ME GOODBYE

像流星　閃出愛情　一刻也長記於心
但浮生　飄忽似雲　分開了難再走近

＊SO KISS ME GOODBYE　有緣沒有份
都珍貴有過一刻跟你共行
只想一生　都記往你的吻
他鄉裡　作我心窩裡孤燈

＃KISS ME GOODBYE　愛是從來沒缺陷
不可以共對一生　心也是真
留往這刻　盡情來熱吻　忘記淚痕
KISS ME GOODBYE

任時光　沖擊愛情　洗出我和你的心
願明天　一身客塵　彼此也能再走近

重唱　＊,＃