Monday, January 29, 2007

荷蘭足球短打(體育世界)



時光迴旋返回1981年左右的香港,本土班霸精工實行“荷蘭化”政策,新到
的荷蘭兵配合高質的華將,打遍香港無敵手,把南華`寶路華`東方等打個
落花流水,差不多把該季全部錦標都贏下來。與此同時,荷蘭的班霸阿積
士(Ajax)訪港,和共有七員荷蘭外援的精工踢了一場表演賽。收收沒記
錯的話, 該役阿積士係被精工逼迫得打出真功夫, 贏了個3-1。

收買佬當年只係看了體育世界的賽事精華,所以對這場比賽的印像不深,
只記得阿積士的球員走位頗為靈活,活動範圍亦頗廣,沒有"前鋒就是前
鋒,後衛就是後衛"的硬性,亦像德國球隊般控球在腳,不會胡亂大腳向
前踢。旁述員就猛讚這叫做“全能足球”。今天看來當然覺得這種打法
沒甚麼新奇,但當年來就頗為超時代啦。除此以外,體育世界還重點介
紹了阿積士的一名重心球員,擁有華人血統的荷蘭國腳林球納(Tscheu
La Ling).收收記得當年林球納接受體育世界的訪問,說他的爺爺係由
中國跑到荷蘭幹活的華工, 後來娶了當地人落地生根並開枝散葉,而他
自己還是第一次到中國....



翻查昔日的足球資料,林球納 80年代初期已經係荷蘭的常規正選,並非
邊緣國腳,屈指一算他應該係告魯夫(Johan Cruijff)的晚輩,但和阿里漢
(Arie Haan) 同期。可惜係這段期間荷蘭國家隊的表現乏善足陣, 所以
林球納從沒有70年代的那班橙衣巨星般令人觸目。

荷蘭國家隊係1974年及1978年兩次在世界盃屈居亞軍,但查實1978年
那隊的水準要比1974年的那隊差 -- 這可能係由於告魯夫缺陣的關係。
後來在1980年於烏拉圭舉辦的“小小世界盃”(一個慶祝世界盃50週年
的盃賽,參賽者為歷屆盟主和荷蘭這支“兩連亞”), 荷蘭兵敗如山倒,
自此荷蘭國足更經歷了差不多十年的衰落, 一直要等到三劍俠的出
現.....

荷蘭國足雖然衰落,但在還未有波士民法案(Bosman Ruling)的年代,
青訓體系完善的荷蘭球會要比今天的舉足輕重,而當年荷甲水平並絕不
亞於德甲或英甲。荷蘭的球隊在歐洲三大球會盃賽的成績還是可以的,
例如1995年阿積士還力壓AC 米蘭勇奪歐聯錦標。可惜自有波士民案
例後, 歐洲的足球秩序推倒重來, 自此荷甲球隊無論財力和戰鬥力都
江河日下, 荷蘭的球會成了新秩序下的最大輸家。

更可惜的是, 林球納經歷了數次的嚴重受傷後, 據說競賽的心理質素
亦越來越差。他後來就在荷蘭國足快將重光之時黯然退役。往後林球
納下海從商變成生意佬。有報導指他經營的健康食品還邀得朗奴高民
(Ronald Koeman) 和雲巴士頓 (Marco van Basten) 做代言人,
絕對係有face亦有money !!~~



[短片所見,今時今日胖了不少的林球納球技退化得好嚴重, 控球技術好
像比收收還要差.....~~~ (Ahemm....)]


延伸引讀: Ajax Nieuws

12 comments:

梁巔巔 said...

收收, 幾靚! 新版都幾好!

另, 你喺 Space 兄度被 google 用咗真名一事, 慘~ 所以, 須帶一提, 千祈唔好 set 公司電郵入 gmail! 因為有一次, 我個朋友被 gmail 用佢公司電郵自動回信畀人!

小心~

Just said...

係3:1? 小弟有d 印象好似係5:4,仲記得當年係老豆帶入場睇,昔日未改建嘅大球場,萬人空巷,好好feel!精工嗰幾年辦外隊非常成功,我仲親眼睇過馬納當拿踼嘅小保加、後來又有一年搞左隊巴西(抑或南美?)明星隊,好似有左腳王伊達、祖利亞、蘇古迪斯等等(呢班82年巴西國家隊都算有今生無來世!)精工年代實在令人回味!

收買佬 said...

梁老闆: Google upgrade blogger 遲唔早唔攪係禮拜一
攪, 頂佢唔順. 打倒佢兩條友仔!!

收買佬 said...

歡迎 Just 兄留言!

我真係唔係100%肯定係3-1 定 5-4, 但精工那場
踢得不錯, 起碼迫到ajax 打真功夫. :-)

至於巴西明星隊那場我有去大球場睇呀. 但唔記得
為乜球會送了好多禮物俾現場觀眾, 那場精工贏了
但比數就唔記得. :)

呢場賽事跟小保加的那場都係 有今生無來世的比賽!

Just said...

講開有今生無來世嘅比賽,精工好似喺再早期搞過宇宙隊嚟,好似係有凱撒大帝、尼斯堅斯等名將(唔記得有冇比利),當然冇入場睇,係老豆租帶俾我睇。話時話而家係咪冇咗宇宙隊?得番隊銀河隊咋?

收買佬 said...

無錯, 77年宇宙隊對精工, 打成3-3...我讀緊幼稚園
低班, 開始睇波. 呢場電視有播0架.

宇宙隊應該摺埋了, 其實應該係那個美國足球聯賽都
縮0左. 今日的MLS 同佢無乜關係.....

Just said...

收兄咁厲害讀緊低B班(講笑咋)就已經睇波,佩服佩服!不如下次開個Topic講吓兒時睇波點滴,來個集體回憶好嗎?

tungpo said...

個場巴西明星隊賽事,國際足協話係非法,結果好似要罰錢。

精工荷蘭兵,最有印象係南寧加。嗰季開鑼前去南華會睇熱身賽精工對印尼唔知乜隊,見到佢真人,好有件頭。該場比賽精工大炒印尼隊。

Just said...

我有印象嘅荷蘭兵:
大猩猩龍門 - 加納
後防悍將 - 韋伯
中場校炮 - 迪莊
快馬 - 華希恩
中鋒 - 史唐

收買佬 said...

仲有哥倫布, 阿里漢, 加賀夫, 邦辛.....

係goalgoalgoal.com 都會睇到有心人scan 番佢地
當年的專訪0架.

又, Just 兄, 你的建議好正, 一於寫寫當年睇波的點滴. :)

Anonymous said...

另有一前荷蘭國脚雲達,佢爺爺都係中國人,仲有一表兄弟住在香港。

Anonymous said...

早於19世紀末,由於鄰近歐洲足球發源地英國,足球在荷蘭國內已經非常盛行, 1908年至1924年更曾連續四屆打入奧運準決賽,不過都未能進一步奪冠...。
到了二十年代,歐洲其他各國已慢慢將足球運動職業化,荷蘭卻停步不前,荷蘭卻進入黑暗期...,直至1957年,國家隊成績不佳促使荷蘭設立職業足球聯賽,盡量提高國家隊水準,荷蘭足球正處在萌芽階段。

七十年代,荷蘭足球終於有大突破!國內球會阿績士、飛燕諾及PSV燕豪芬紛紛在歐洲盃賽上取得驕人成績,而國家隊則以阿績士球員為骨幹,組成一支前所未有的強大隊伍,其中球王告魯夫、尼斯堅斯、凱恩、高魯、蘇比亞,加上飛燕諾既漢尼金、贊臣更是為人所熟悉。這支橙衣兵團在「全能足球之父」米高斯帶領之下,以全能足球戰術,球員無特定位置,攻守技術全面,依場上情況作適當走位同判斷,十上十落的打法轟動整個世界球壇。七四西德世界盃,荷蘭以無敵姿態殺入決賽,其中十六強戰勝阿根廷4:0、四強戰勝巴西2:0的賽事更令人津津樂道,但無奈決賽敗於主辦國西德而屈居亞軍。七八阿根廷世界盃,荷蘭捲土重來,淘汰階段分別殺敗宿敵西德及意大利再一次晉身決賽,可惜往往事與願違,再一次以總比數1:3敗於主辦國阿根廷而飲恨。

八十年代,在眾主力退休之下於八二年及八六年都無法晉身世界盃決賽周,直至「荷蘭三劍俠」古烈治、雲巴士頓及列卡特的出現,加上朗奴高文等球星,在八八西德歐洲國家盃終於能在決賽以2:0殺敗蘇聯而第一次高舉歐洲國家盃獎杯,是為荷蘭史上最高成就!

九十年代,於九零意大利世界盃,在球員狀態不足之下於十六強被勁敵西德以2:1擊敗,其中更發生列卡特與西德球員禾拉的吐口水事件,令荷蘭足球蒙羞。九二年瑞典歐洲國家盃四強遇上該屆冠軍丹麥,雙方2:2打成平手,互射十二碼之下再一次成為犧牲品,其中雲巴士頓的一射更被演出神勇的舒米高撲出。九四美國世界盃,八強對著該屆冠軍巴西,曾於落後兩球的劣勢下追成平手,可惜最後再輸一球以2:3落敗,無緣晉級,而隨著三劍俠時代既黯然終結,柏金肩負起所有荷蘭球迷既希望。九六英格蘭歐洲國家盃,分組賽曾被英格蘭以4:1擊敗,幸好最後憑著多一球的得球以次名出線次圈,惟獨好景不常,八強被法國以互射十二碼的方式淘汰。九八法國世界盃,荷蘭表現非常出色,八強之戰對阿根廷伯金的世界波更是金球之中的金球,直接帶領荷蘭闖入四強,眼看有機會第一次成為世界冠軍之時,四強戰對巴西1:1後再在互射十二碼中被淘汰出局,季軍戰中在無心戀戰之下被新丁克羅地亞擊敗,只能獲殿軍而回。

二零零零荷蘭/比利時歐洲國家盃,荷蘭以東道主之利一度過關斬將,四強遇著意大利,早段已令意大利少踢一人,在大好形勢之下曾獲得兩個十二碼,可惜隊長法蘭迪保亞及射手古華特皆射失,最終以0:0完場,又是以互射十二碼出局,未能再一次嘗到歐洲冠軍的滋味,而一代巨星伯金亦宣佈退出國家隊。在伯金引退及主力禁藥問題之下,荷蘭在零二日本/韓國世界盃外圍賽竟被平平無奇的愛爾蘭及葡萄牙擊敗而無法晉身決賽周,令荷蘭球迷們非常失望。

荷蘭,十上十落的打法曾被譽為歐洲最佳球隊,而鮮橙色的球衣更是進攻足球的標記,無奈始終與世界盃冠軍緣慳一面……互射十二碼更是荷蘭的死穴。在防守足球抬頭的大勢所趨之下,荷蘭的進攻足球能否稱霸世界仍是未知之數。