Monday, July 30, 2007

集體回憶? (社會文化)

保衛天星的示威者把戰線橫推﹐天星碼頭陷落後﹐把主戰線移至
鄰旁的皇后碼頭。如同上次一樣﹐示威者們再把一大堆集體回憶
呀﹐保育呀﹐“是否舊的東西就一定要丟掉呀﹖” 等一堆的概念和
口號硬塞給廣大市民﹐看得令人厭煩。收買佬不想再花時間精神
評論了﹐倒想在這一刻講講我的中區集體回憶。:)

話說收收小時候﹐香港還沒有聯合交易所﹐斯時全香港共有四個
股票交易所﹐人稱“四會”。當中有某個以華資會員為主﹐交易大
堂位於天星碼頭旁的“圓窗大廈”。收收家人當時從事金融業﹐而
他們的辦公室就在中區電車路的某幢乙級寫字樓。放暑假時收收
有時也會跟家人到寫字樓“打躉”。收收每回出訪例必去附近餐室
吃下午茶及雪糕之類﹐又或到大會堂的圖書館看書﹐非常正斗。

當時由於收收和家人出入皆由私家車代步﹐甚少坐輪船過海﹐小
時候對中環天星的回憶﹐遠沒有對大會堂的深刻。後來收收年長﹐
課餘時偶然被徵召去派送文件﹐因此經常在中西區一帶行走﹐正
是目睹一幢幢大廈被拆﹐又目睹一懂幢大廈落成﹐更目睹了海岸
線的北移﹐真正的滄海桑田也。

往後多年收買佬出入中區﹐通常是跟同學朋友們去吃喝玩樂。其
後收收畢業﹐投入勞動市場並一直在中區謀生至今。當中有很長
時期收買佬是在“圓窗大廈”和“買賣廣場”上班﹐捨遠圖近貪便宜﹐
差不多天天都乘搭小輪上下班﹔而那個既髒又大風的皇后碼頭﹐
很多時成為了我跟同事吹水抽煙的場所 -- 選擇在皇后碼頭吹水﹐
是因為這地方安全和隱閉﹐不然也不會有那麼多金融大鱷和老鼠
選擇在碼頭收授賄款贓款啦﹐哈哈。

常常疑惑那些大喊集體回憶的人﹐知不知道希爾頓酒店﹐拱北行﹐
消防局等建築物當年位處何方﹖若然從未感受過亦從未逛過﹐何
來集體回憶﹖收買佬自己就不會對新界的舊墟有甚麼回憶啦。查
實回憶這玩意﹐應當是在心中的。保留一些死物﹐去強玩自己認
知及接觸不深的回憶﹐老實說非常攪笑。

昨天有一個天星員工﹐說自己拉船卅多年﹐對於拆卸碼頭﹐他內
心雖然有點不捨得﹐但保育與發展﹐總要有個平衡﹐所以他讚成
遷拆 -- 這﹐正正是收買佬的心聲。感謝他說了我想說的。~~


(短片: 愛人同志, 棋王/文革版MV)

講多無謂, 點首歌俾大家聽, 就是羅大佑的愛人同志.

11 comments:

Anonymous said...

點解依家政府做親乜都比人鬧,又唔見97前有咁多聲氣,此乃拜肥彭留低D手尾比人囉,聲聲搬出個民主牌出嚟,咁就攪到下手唔見好多人カ物力,嚟D咪嘥緊香港納稅人D錢囉!

要講集體回憶,係咁意都數到十樣八樣緊要果皇后碼頭啦!

咁我班中坑咪要絕食番一年半載,係咁嗌----「還我啓德機場、荔園、老襯亭、我地舊時間小學同埋全屋村細路都去過嘅氹氹轉遊樂場、係屋企出邊嘅公厠......最重要其實係要保留番-----我地D原庒香港人自食其力、守望相助的鄰里情,而唔係好似家陣連隔籬屋姓乜都唔知,剩係顧住自我泛濫嘅權利!!!

The Inner Space said...

哈哈哈!


高等法院接納本土行動成員要求阻止政府清拆皇后碼頭的司法覆核申請,排期下周二聆訊。

收買佬 said...

做JR﹐都唔代表“土炮行動”會贏。同
領匯單0野一樣﹐又看看輸了他們會怎
樣﹖(CFI 玩完玩到去CFA....? :))

tungpo said...

我睇班友JR輸多過乜。又,佢地攞咗法援未?

The Inner Space said...

內耗日繁!

Anonymous said...

回憶~~逝去的愛在心頭~~

老實講我對政府處事手法都好反感,但係叫我跟班黃毛小子一齊講回憶我又真係冇咁嬌情偽善,印象中連自己咁大個人去過皇后碼頭未都唔肯定!哈!!

呢個版本都係羅大佑唱??我睇過佢後期d live,把聲差得遠,沙啞得黎兼沉好多
不過佢既創作華人地區來說真係神奇頂級超卓,某方面比張雨生的更成熟~~

香港幾時先可以再出個咁樣既音樂創作人呢..唉..

收買佬 said...

師兄﹕查實豬先生他們的後台九唔夠硬
的﹖若然無Legal Aid﹐他們又玩到老
虔婆0甘大﹐一路上訴殺上去﹐真係不
幸輸晒要賠cost﹐他們的盟友會否幫
手先﹖定學卿姐0甘周圍問人捐錢﹖定
係本死無大害﹐破產算數﹖

又﹐覺得條友比那些自以為士一族更
柒﹐非常唔掂檔。:)

Space兄﹕正是。這幾單案驅使了收收
好好重新溫習constitutional and Administrative Law。(幾本英美出
版的textbook掉低九千幾年﹐終於重
見天日﹗)

P 叔﹕頂你﹐咪扮老啦。人地豬生大你
十幾廿年﹐你叫人黃毛小子﹖(雖然﹐論
思想﹐呢班人比起你確係“後生”得多。)

The Inner Space said...

唔好意思只是想澄清﹐羅大佑應是來自台灣創作歌手﹐不是香港土產的罷。對羅大佑的「東方之珠」和「皇后大道東」較認識。

收買佬 said...

羅大佑係台灣歌手不錯, 但佢最令港人認識的,
都怕係你提及的那兩首歌曲.

Anonymous said...

>又看看輸了他們會怎樣﹖

佢地點會輸?幾時佢地都自以為贏左。

The Inner Space said...

QUEEN‘S JR
雙方都出金牌大狀﹐
法援批了夠請李柱銘﹐就算李是友情價﹐法官法庭人員燈油火蠟﹐全是納稅人的公帑!

輸家係邊個?