Monday, January 28, 2008

談談人和事 (金融經濟), (體育世界)

香港經濟

雖然收買佬於25000點附近大清倉不再玩﹐加上近期連日多講體育少講樓股﹐但查實我多少還有留意大市的﹗上週的暴升暴跌﹐可以用恐怖二字來形容。若以期指收市價與前周收市價相比,雖然只錄得百多點的輕微升幅,但一週之間的高低波幅差不多有四千點,比過往幾年的全年波幅還要大 ﹗有炒家老友說由於去年市場見頂乃突如其來,除了少數於高位沽空造淡的超級大鱷外﹐相信不少投資者都走避不及。而法興坐公司盤職員炒爆倉﹐蝕掉公司幾十億歐羅,應該不會是個別事件,蓋銀行的監控部門﹐現在應該不停查數﹔有做老鼠倉的﹐就算有賺﹐平倉也是刻不容緩。牽一髮動全身﹐相信爆煲事件陸續有來,股市難言樂觀。各位投資者務請冷靜,市況如此波動,衝動對閣下的身家絕無好處。

又﹐一些舊同事和老友們都報稱錄得嚴重虧損,而虧蝕之數更係創下他們某幾位一生人最勁虧損紀錄。死未﹖

至於利率走向﹐兩年前小弟的預言雖然遲來了﹐但總算給我猜中 -- 即係﹐大鱷及超大鱷們會不停的舞高弄底﹐去試試新上任局長的底線﹐看他能承受多大的升跌幅才會去加減息﹐此乃交易員摸局長底的行為也。美國減息,香港受累,查本港於沒有減息必要的情況下減息,所以通漲火上加油。樓市近日急升,做到間間律師樓要加班﹐但背後多少因為低息,而非實質經濟支持。因此升的幾全為有得炒的新樓﹐用家為主的物業﹐買賣兩閒﹐蓋買賣差價幅度過大也。

事有巧合﹐在通漲壓力慢慢湧現之時﹐又碰上五十年難得一見的大風雪﹐兼夾中央政府的一刀切控制能源價格﹐令能源生產減少之餘﹐貨物運輸亦出現困難﹐加上年關將至﹐通漲之勢預期甚猛。現在只有希望﹐發展下去是通漲而非滯漲.....


鴨子柏圖(Pato)



早說過這小子跟我當年的roommate 樣子很像。 而當事人就說除了髮型外﹐他倆可謂倒模一樣。所以收買佬每次看他踢球﹐倒非常有親切感。

作為今季AC米蘭的最重本收購﹐柏圖的上陣絕對令人期待。由於歐盟法規的問題﹐柏圖並未能在上半季上陣.因此他的處子戰要延遲到本月中才上演。他腳頭也挺好﹐米蘭眾將血洗拿玻里於聖西路。是役他的表現談不上光芒四射﹐主角仍然是卡卡哥哥﹐與及隊中其他的叔叔伯伯﹐但好歹他也射入一球﹐非常吉利。及後的多場比賽﹐他的表現亦算合格﹐只是身材略為單薄﹐在對方禁區的把握力和配合有待進步。但始終他是意甲初哥﹐何妨給他一些時間去進步呢﹖收買佬主觀覺得﹐此人不會不成器的。

又﹐一代新人推舊人﹐當巴塞小虎保贊小弟(卻基治)尊稱亨利為Uncle Henry 時﹐收買佬不得不意識到自己已經十分老餅。


(短片﹕Pato's very first goal in Serie A !)

p.s. 昨晚“鴨子”他梅開二度﹐為AC米蘭幹掉了熱那亞﹐恭喜晒。

9 comments:

Anonymous said...

恆指期貨2008年01月的結算日就到,個位世叔幫 收買仔 Short 個張期指是邊個月份呀? 即月係唔係1月30日埋單,好淡爭持!

另,同 收收兄 好有緣份個位,一樣有波入,恭喜恭喜,幫助老婦人勝出 3-1 。

收買佬 said...

Space Sir: 個張期指晨早平了倉啦。

gaubinfor said...

- 滯脹的殺傷力肯定比通縮更大. 自問識唔少做生意既朋友, 不少捱過 97, 00, SARS 既, 今年都私下講明過年後定必人間蒸發.

響大陸開廠個班, 大前年已陸續把廠關門 / 送比伙記後買幾隻漁船去馬達加斯加對出補魚既有之, 買塊農地搞有機耕種者有之, 套現後回港炒樓炒股炒金炒資源材料者更多.

仍堅持繼續做廠但將工廠搬去內陸和越南既都有, 但所識呢類廠佬都係大陸人.

- 不過今日非常多朋友入貨搏明日繼續及又來 deep V, 特別係錯過 22 號大跌市個班. 個個話大陸風雪越大入貨越要起勁, 今日最多人入煤礦股.

- 也越來越多朋有深信 hk 股市越跌 = 再減息壓力越大 = 樓市越起 , 甚至開始用 can fully hedge 而非 decoupling 去形容 hk 樓市與股市的關係.

- 從廣州的領導既角度睇, 呢場 "N 年一遇" 的大風雪千祈求神拜佛點要拖到至少年初三, 等佢地有藉口把火車和長途客車一路停駛至春節後 , 逼多 d 民工心灰意冷寧願滯留廣州放棄回鄉. 否則, 無論當局點預先安排, 只要有丁點風聲話過年前有火車和長途車班次可恢復, 年初一電視新聞的頭條一定係廣州車站人踩人傷亡以千計, 大吉利是之餘更會令新上任的領導們凳未坐暖已烏紗不保.

Unknown said...

其實 Pato 是因為

1. 夏天轉會窗 31-8 完結
2. 國際足協規定, 18 歲或以上才可以球會之間轉會
3. Pato 剛剛好 2-9 生日, 先18 歲

就是兩日之差, 令 Pato 不能在夏天轉會窗完成轉會, 在米蘭預備組跟操三個月

收買佬 said...

gaubinfor:好似你講過話今年係行緊
94年個勢﹐若如是就俾你講中。分別
只係上回乃新曆新年前見頂回落﹐今
回係舊曆新年。

以前通縮有圍到數﹐就算生意難做起
碼無乜成本問題﹐仲樂得清閒0忝。家
陣日做夜做為業主打工﹐都幾灰。

至於廣東/南方地區﹐都唔係今日先開
始惡搞啦﹐兩年前已經缺人缺電兼要
被日日新鮮的苛政去蹂躪啦﹗

Flying Donkey: 謝謝資料補充。:)

Anonymous said...

個人對金融經濟理解唔多

但個人感覺香港各行各業既競爭力日漸俾其他亞洲城市日漸趕上甚至取代,呢班一日到黑炒炒炒既股民真係好大責任
咁落去呢個政府十年八年內都唔會再有動力去諗點樣經濟轉型,直至香港咩優勢都冇哂為止

可能我真係入世未深,諗野未夠成熟唔知錢既重要性
唔岩聽勿插;)

Anonymous said...

收爺
樓價似神檯桔咁陰乾, 買賣兩閒連帶周邊相關行業萎縮, 呢種苦況我地捱八萬五果時已經知道有幾金. 美國佬D樓按斷供潮都未到高峰, 遲 D 信用咭數拖無可拖, 好似當年港燦咁破產人數每年創新高. 又美國神童輝, 阿 B之流都好似未出現, 怕者未到最黑暗時刻.
當年亞洲金融風暴, IMF話亞洲各國應該要加息去撐自己貨幣, 減公共開支去改善政府赤字- 減醫療減教育總之減得就減, 唔應該由政府出手幫 D 經營不善銀行去度難關以免鼓勵信貸泛濫. 如今美國佬周身屎, IMF 就話歐洲央行有減息空間, 即係齊齊去幫美國佬頂, 美國佬自己就搏命減息又退稅,英國就出手救 Northern Rock, 法國佬死都要撐住喪珍(Soc-Gen), 班白鬼平時滿口仁義道德, 自己踩屎果時就不擇手段.

Anonymous said...

又, 剛睇到新聞話熱爆全城之男盜女娼淫相一案, 放相上網條友不准保釋, 押到過年後再審云. 有冇搞乜錯呀 ? 姑勿論入唔入到罪已經有疑問, 就算入到,發放淫相條罪有幾重 ? 對社會有幾大危害性 ? 家下有理冇理先踎八個星期監, d 裁判官水平真係不知所謂.

收買佬 said...

飛sir: 有關淫相討論﹐請到通寶師
兄個BLOG 度吹,0個邊的討論比xocat
有深度得多。又﹐年假前後應有一個
小陽春﹐但之後應該會幾難頂。

P: 炒賣本無罪﹐但貪勝不知輸唔考
量風險亂來就唔正確﹗