做到悶﹐講講波 [最後更新] (體育世界)

克羅地亞國家打比﹕薩格勒布戴拿模 v. 夏德

一場比想像中更加精彩的比賽﹐就看這兩隊的表現﹐克羅地亞國內聯賽的水平不低於在蘇超俄超荷甲之類。前南斯拉夫別號歐洲巴西﹐今天塞爾維亞已經跌晒watt﹐但係克羅地亞仲算撐得起歐洲巴西這個招牌。


(短片﹕Dinamo - Hajduk 1:0 (Match Highlights))

兩邊的球員腳下功夫都不俗﹐特別係前者。無論傳送配合走位都好有功架﹐並非亂交亂射走死位﹐而係好有心思用腦踢球﹐絕非亂來那種。

薩格勒布戴拿模兩邊的球員都好厲害﹐快上快落突破能力高﹐十分有威脅。季初他們係歐聯外圍賽第三圈面對雲達不萊梅﹐已經見識過那幾個巴西人的厲害﹐那回若非迪亞高有超水準表現﹐又若非球証枉判一個十二碼﹐出局的可能真係雲達....至於夏德﹐我覺得他們的中路滲入較為出色﹐控傳都做得好好。10號球員係賀歲盃已經發覺好重炮﹐這一場就更加勁。

總之﹐雖然只係得一球交易﹐但係就好鬼正。難怪那位叫太宰二的網民﹐對克羅地亞足球如此癡迷。網上有機會可以看到的話﹐真要多點留意一下。


俄羅斯超級盃﹕辛尼特 vs 莫斯科火車頭

水兵鬥海軍﹐但都算幾刺激。辛尼特可能要留力踢足協盃﹐有些主力無上陣(包括南韓國腳金東俊)﹐但人腳配合純熟﹐兩翼進攻頗有威脅﹐足夠應付只會長傳急攻兼球員腳法一般的火車頭。終於憑火車頭門將一個低能錯誤先打開紀錄。下半場火車頭傾力反撲﹐但辛尼特頂得住﹐雙方各入一球﹐辛尼特最終贏得超級盃﹐他們和史浩克04兩兄弟﹐近來十分行好運。


(短片﹕這一球真係柒到無朋友﹗)

又﹐有網友說俄羅斯 (蘇聯) 真係繼戴沙夫之後係冇出過一個有級數既龍門。查上面這位天才是其實係烏茲別克國腳﹐烏茲別克主場被香港迫和2-2 的那一場世界盃外圍賽﹐可能亦係這個懵佬把關。


英超最強, 只限BIG-4 !

老廢廢人講廢話﹐在英超有四隊殺入歐聯八強後﹐拋出"英超最強論".

查英超係歐聯坐大﹐係自昨年始。然而放眼BIG-4﹐無論領隊教練亦或球員主力﹐無人不是外援﹐跟本土球員無關。以往意甲和西甲球隊獨大時﹐靠的係戰術上的優勝﹐外援雖好﹐土炮亦不失禮。但現在英超﹖試試叫基謹帶領英倫三島球員征戰﹐你道成績會是怎樣﹖

傳媒大力吹捧﹐真正球迷只會覺得好笑。單看直播權費用﹐英超遠遠高於意甲和西甲。大量質佳外援流入英超是自歐洲最商業成功的聯賽, 那英超不強大才出奇。圖片報講得好﹕$$ makes goals。