Monday, November 24, 2008

談讀書(政治評論/怪論)

食評有鱔稿﹐股評有鱔稿﹐乜鬼都有。而家陣就發展到連專上教育都有鱔稿。這些鱔稿的目標讀者有兩類﹐一種係教育制度下讀不上﹐要尋出路的﹔另一種係那些本身大學畢業但就想持續進修的。

好多人都愛(持續)進修﹐主觀意願係提升競爭能力。呢個想法其實好好﹐但就被一些教育棍看穿﹐不斷的開辦一些好像社會很需要的課程﹐由副學士讀到碩士一條龍。但十之八九這些學科既不實用﹐"市場"亦並非如鱔稿所吹那麼壯大。

向後回望﹐收買佬讀中學時還未有太多鱔稿叫人去讀這讀那﹔通常只是我母校的英文老師Peter Chiu 教人大學讀甚麼系較佳。當年最熱門的並非甚麼BBA 或法律﹐而係土木工程及建築。可當年的這些畢業生﹐今天要不是苦等十大工程上馬﹐便可能要遠赴海外找工作了.....哎。

我大學畢業/回歸後又興起讀IT﹐由砌機課程到那些 MSc in Information Technology 都有﹐乘十年前的IT 巨勢﹐開辦這些課程的機構亦非常好搵。後來IT 泡沫爆破﹐IT人亦風光不再。"教育商人"見dotcom 不成﹐改推搞實業的物流﹐同時又力吹一些較專業的東西﹐像MBA﹐CFP﹐精算﹐會計甚至Law..... 一時"人材輩出"﹐學位都有通漲。(按﹕後兩者始終有專業工會把關﹐入行人數可以有力地控制﹐算係無0甘傷﹔而精算﹑法律和CFA這類亦非人人有料完成﹐因此見到的係讀的人多﹐完成的人少好多的現像)。幸好早幾年市況好﹐這些人材亦較易被吸納﹐並無搞出大問題。

然而際此金融海嘯之際﹐人人都不自覺的想增值去讀點甚麼。這正中教育商人下懷﹐收買佬大膽推算﹐這一期的熱門學科會係下列這些﹕

1) 仲裁/調解的碩士課程﹐吸納那些律師夢碎的去讀。明年4月本地司法改革﹐仲裁員角色會係真的會比以前吃重。但“市場”會有多大﹐收買佬就保持觀望啦。

2) 廣告/媒體/物業管理 -- 鱔稿會說祖國大陸係這方面如何落後﹐市場如何有潛力﹐北望神州﹐讀完有前景。

3) 神學 -- 牧師收入穩定﹐市好與否都要去做禮拜啦。 (一笑)

與此同時﹐商科的演化並無隨金融海嘯而停下來。往昔先有BBA/BComm﹐再之後有MBA。到了今天﹐MBA 也貶值﹐坊間陸續有一些DBA的課程去讓有志者更上一層樓。但由BBA 到 MBA 到DBA﹐讀的我想不外乎又係Management﹐Marketing﹐Human Resource Management﹐ Intermational Business等本質純吹水的科目,又或甚麼Organizational Behavior﹐Information/Operation Management 等七拼八湊的東西。較有用的應是Economics 及 Finance﹐但應該只是基本入門班。好老實﹐讀這些東西絕對是浪費金錢和時間。通寶師兄說過﹕一百幾十年前的大學﹐那有這些重利不重學的學科﹖個人認為甚是。

先此聲明﹕收買佬本文只是針對/提醒那些為了迎合市場需要才去進修的人。看官若真的有志研修Marketing 或 Management﹐對那些甚麼"浪咸平生產鏈"﹐或"管理學的五常法"﹐又或對做IT Support 或仲裁員有無比興趣的看官﹐就敬請不要理會小弟這篇垃圾怪論。蓋一個人讀書﹐應選有興趣的科目﹐不然讀得沒勁﹐亦不會弄出甚麼成績。

12 comments:

Anonymous said...

除收收你提及各種巧立名目的 "仲裁" 課程及 DBA 外 :

- double major,以往多以 BBA+LLB 或 BBA+BSc (資訊科技) 為主,不過所知將出現的雙主修組合會越來越 9 唔搭 8

- Juris Doctor,總覺呢個 title 與 DBA 同類

- "中國 xx 專業文憑",最好利錢的校外進修課程多先冠以 "中國" 二字,不過當中仍有相當具質素及認受性者

收買佬 said...

JD 係HK既定位係介乎於LLB 同 LLM 之間。但係唔同於LLB/LLM﹐JD 收得好X貴。

lscpeterman said...

依家先知你同我係讀同一間中學

皮趙依家都退左休喇.

lscpeterman

imak said...

外國人會為興趣專長而去修讀某某學科而成為專家 (或讀個phd 返黎走去做老麥也大有人在). 香港人以賺錢為大前提, 教育商人只是衍生工具, 那些"BS" 科目的CERT 是用來 furnish CV 既姐!

Anonymous said...

請問提及既明年四月司法改革係乜野?有無資料可以睇下

Eric Spanner said...

新教神學近年「內需」市場似乎已經甚殷,某o的神學院甚至搞埋town centre,或唔只因為傳道、牧師等有市(不斷擴展也),亦可能係因為部分高學歷又有少少錢o既三四五十教友,想趁機「增值」,「改進」信仰云云。反而教外人由零開始去讀,恐怕冇咁易同咁快也。

收買佬 said...

兩位師兄弟﹕你地好﹗

mak 姐﹕想當年我仲係"收買佬"時﹐有幸接待過一位教育商人。對方不斷地說成人教育事業大有可為﹐未來收入會係幾何級數上.....我年少無知﹐那時先知道有distance learning 呢家0野﹐亦係那時先知0甘多人願意放工進修唔去wet﹐好感動。

anon: http://www.civiljustice.gov.hk/

Anonymous said...

天災地震,風暴,海嘯,最大既動物最早死,最早絕種,恐龍大到......大象世界都不多!!
原來套用經濟都係咁,花旗.aig等,大到無人有,最後.......大澳一間士多仔,做5代都仲係度

ksli said...

世上總有「真正適合讀business」的人,只是大多數入商學院者恐怕不是這類人、沒了解便步入罷了。

收買佬 said...

ksli: Couldnt agree with you more....:)

breitner said...

而家猛咁吹 "持續進修", 然後話你永遠都進修唔夠
十足十好似掛條蘿蔔在驢仔既前面
要佢永遠向前走但又永遠唔會俾佢食得到果條蘿蔔

遲d肯定又會有d高官/名人 (即係好似幾年前梁錦松之流)
叫果d搵唔到野做既人 "進修啦!" "再培訓啦!"
如梁文道所講當市民醒覺 "再培訓都未必有用"
呢d人又會再話 "咁又繼續搵另一d野 [再進修], [再再培訓] 啦"

用社會學 marxist 既觀點睇
呢d係資本家及統治階級製造既 myth:
話你永遠都讀書唔夠, 達唔到佢地既 "要求"
然後製造某種因為 "競爭力不足" 可能會失去工作既恐懼黎嚇你
令你一日到黑番工之外, 連放工都唔可以有自己既生活
要繼續去 "進修", 繼續學如何成為一件合老闆用既 "工具"
配合佢地既價值觀
永遠都受呢d資本家及統治階級既奴役

呢種新型奴役方式, 可稱之為 "新原始資本主義"
同百幾年前工業革命時代既社會型態越來越相似

tungpo said...

收收,唔係卦。我阿哥讀Arch個年代,土木工程已經瞓街啦喎,我阿哥佢地重笑話呢科係工程系最yap,居然重有人覺得熱門?

燦哥,據說,DBA係啲second tier大學先會搞。