Tuesday, March 04, 2008

我最討厭的曼聯和匯豐 (金融經濟), (體育世界)


(圖: 香港匯豐總行)

收買佬厭惡的事物有二﹐一為聽曼聯(和英格蘭)的球迷講波﹐另一為在匯豐銀行排隊。猶記得曼聯僥倖贏取 "三冠王" 的第二天﹐收買佬在匯豐總行排隊入錢﹐身後有一名曼聯球迷跟朋友 "高談偉論" 並分享喜悅。排長長的隊輪候﹐還要聽曼聯迷的廢話﹐慘被折磨了半小時有多。有那麼的幾刻﹐真有一個衝動想把那小子捉出來“打鑊金”﹗﹗

作為英國殖民地﹐香港市民從小便熱愛祖家和他的企業。當中﹐曼聯和匯豐可謂最受殖民地人民的愛戴。前者常被當成無敵班霸﹐後者則常被當作優質股王。他們那些盲目的fans﹐總愛把他們褒到天下無敵﹐真令人受不了。

首先說說紅魔吧﹐在上世紀60年代以前﹐曼聯只是半紅不黑的一支球隊。六十年代曾風光了兩三年﹐成就莫說難跟皇馬﹑巴塞和米蘭雙雄相比﹐就是他們英國老家的熱刺也比他們強﹔及後浮浮沉沉﹐偶然會贏得一些盃賽冠軍﹐但仍然不成氣候﹐像今天的利物浦般窩囊。九十年代曼聯開始在國內興起﹐這得歸功於費爵爺的青訓成功﹐與及一流的市場策略﹐把一個個平庸的球員塑造成明星 -- 今時今日可能連火星人都知道誰是碧咸(David Beckham)。(然而“柒咸”是否一個好球員呢﹖這個嘛.....哈﹗哈﹗﹗哈﹗﹗﹗)

曼聯有這麼一班“義和團球迷”﹐英超又年年有熱錢湧入﹐當年挾著三冠王的餘威﹐照理紅魔應該有一番作為才是。可事實不然﹐曼聯連年在歐州賽場折戟沉沙﹐打得十分窩囊﹐實力明顯跟真正的列強有段距離。雖然他們仍然稱霸國內﹐但有腦的球迷都清楚﹐沒有“友會”和球証的鼎力幫忙﹐他們那會贏得如此輕鬆﹖看看近年的歐聯往績﹐你就知道曼聯雖云大陸化經年﹐但仍然只是一支二流球隊。(看官應該記得兩季前他們在小組墊底出局的醜事吧﹗)


(短片﹕AC米蘭贏曼聯3-0 把他們踢出局的賽事)

而匯豐呢﹖跟曼聯差不多﹐也是靠當權派(港英政府)的眷顧而坐大。匯豐像曼聯一樣﹐都是直至近數年才邁向世界。此前只能在自家地盤“扮大佬”﹐在世界的其他地方﹐完全不成氣候。當時雖云號稱業務遍及中東和歐美等地﹐但生意仍然集中在香港和東亞地區。80年代之收購蘇格蘭皇家銀行失敗﹐猶如當年曼聯在歐洲盃賽出局般﹐乃他們當時真正實力的反映。

1990年乃他倆的隆興點﹐是年紅魔代表英格蘭重返闊別經年的歐洲賽場﹐還給他誤打誤撞取得些成績﹔匯豐是年則全面併購了米特蘭銀行 (Midland Bank)﹐以此為未來回鄉打拼的根據點。這時候﹐費格遜和浦偉士兩位爵爺﹐都有雄圖大計﹐都在發其稱霸地球之夢。

到了1998/9年﹐紅魔和匯豐齊齊爆發﹐前者幸運地奪得三冠王﹐被傳媒褒到上天下地﹔後者則於是年企業重組﹐把股份一拆三﹐統一全球的形像﹐還於港美英三地同步上市。當然﹐風光背後不無水份﹐匯豐所謂的美國上市只是預托証券(ADR)形式上市﹐而曼聯就在世界冠軍球會盃被其他大洲的盟主盡情魚肉﹐樣衰衰的出局了。

回望近年﹐兩者都係原地踏步。曼聯仍然未能稱霸歐洲﹐匯豐就為次按所累﹐投資銀行業務仍然無料到。兩者始終未能成為地球盟主 -- 前者只能勇挫熱刺和保頓﹐後者只能向公公婆婆推銷基金和保險﹐與及像昨天般透過一些非經常性收入來報喜。喂﹐十年前你們已經在英超聯賽和香港市場稱霸啦﹐今天還有臉用這種戰績報喜﹖﹖真不要臉呀﹗﹗

Disclaimer: 收買佬最憎這兩間企業﹐當然沒有他們的股票啦﹗

15 comments:

the inner space said...

0005
優質的資產賣咗就會少啲!
靠賣嘢原是非經常性收入,
年年都賣就成經常性收入,
哈哈哈會計師公會敢出聲?

Football Club
收兄成日話個啲法國球會,
荷蘭球會賣嗮的優質球員,
成績低落,由有實力球隊,
問鼎歐聯,變成青訓球隊,
靠賣球員,同靠標青成績,
來賺取利潤是兩種類生意。

tungpo said...

滙豐唔少服務食水幾深,例如買賣外幣。最初個仔去英國時,我地貪方便係佢度買英鎊。後來,發覺佢啲匯價完全食人隻車,即刻走人。

收買佬 said...

Space: 有d 球會一樣可以又賣球員但keep 到好成績, 你睇西維爾就知. 咩時候以咩價買賣咩貨色,係一門學問 -- 阿積士, 拉科呢挺亂0甘賣, 紐卡素, 列斯聯呢挺就亂買, 所以他們最後都仆晒街. 就好似以前的怡和0甘樣衰. :)

寶baby: 匯豐根本就係屈水機構, 奇怪d 人只係丟地產商, 相對地無乜小班亂發信用咭, 落雨收遮, 濫收費用的銀行佬!!

你的粉絲 said...

收爺呢次個話題好有有爭議性, 我又可以發揮包拗頸本色.
講波唔敢響你面前扮識野, 不過話大英遺民戀主情意結投射落紅軍 "盲戀" 怕者係近幾年後殖民地時期潮流卦 ? 記得細個時好日都冇餐英國波睇下, 但甚麼兵工廠(今日藍軍), 離乜譜一類球隊名就如雷灌耳. 早年英國靚仔球星連尼加似乎名氣不下於碧含.但商品化就似乎冇大碧咁成功.
銀行食水深就唔只大笨象, 揸兜, 花旗之類一樣係撳住搶. 所謂行大欺客就係咁喇. 不過你講得對, 班口水佬紅衛兵只識狗咬狗, 淨係眼紅班黃面財主佬, 以前幾時有人吠過置地怡和 ? 冇利益輸送又點養得大匯豐 ? 不過, 養得佢長大成人, 佢衝出維港外又做得好好睇睇就算以前班管理層有 d 本事. 但近年就一蟹不如一蟹矣.

阿茂 said...

大佬,

我終於讀完我o既 accounting course 啦... 可以再成為 otaku 啦... 哈哈哈...

仔仔o點啊? can't wait to see you all later this year... :)

阿茂

收買佬 said...

飛爺﹕唔係話匯豐(及曼聯)差。講真﹐
點計他們都係跨國大機構﹐實力點都
有d﹔但係咪真係堅到稱王稱霸俾他玩
晒呢﹖當然唔係啦。但他們的fans就
堅信係0甘0羅。某程度上他們0甘死
乞人憎﹐都係拜他們的fans 所賜﹗

阿茂賢弟﹕恭喜恭喜﹗恭喜你有喜﹗

收買佬 said...

又, 無記錯當年(大約小五小六時), 曼聯差d 降班,
老費都差小小被炒....佢同格老都係個期新官上任,
結果一個差d 攪到球會降班; 一個就攪了個股災出
來.

Anonymous said...

第一次見人將曼聯同匯豐拉埋一齊講,重要講得頭頭是道。哈。但係我雖然唔鐘意曼聯,亦要承認佢地係世上最勁既球隊之一。

goldenbaby said...

....見到廢爵爺咬香ロ膠個樣我就火滾..

{廣告時間)足球週刊今期(113)有華裔荷籣球星林球立詳盡專訪,米走鷄!!!

收買佬 said...

匿名兄﹕過獎啦﹐我都係吹水唔抹嘴0者。

goldenbaby兄﹕今期足週一早買了。想唔到林球納話Van Hanegem原來都有1/4華人血統。

goldenbaby said...

華人早年漂洋過海,可能仲有好多咁既故事...
早十多年前在哥斯達尼加,見過鄭兆聰的幾個堂弟踢波(半職業),唔錯架,不過佢地唔係響香港出世,所以無球會會出錢請個華裔外援,可能香港d老細認為外援應該係鬼佬卦...。鄭兆聰首次返港去愉園會試腳,都係自掏腰包架.....

收買佬 said...

啊? goldenbaby 兄, 乜你係中美洲返來0架?!

goldenbaby said...

在哥國探親,住左一個月左右..

收買佬 said...

goldenbaby 兄: 未知閣下是否署名"橙色力量"的網友, 如是就幸會幸會, 亦感謝連結蔽網... :)

goldenbaby said...

收sir:不是喔。