Monday, June 16, 2008

[體育與政治掛勾系列]﹕「星之隊」 (歷史文學), (體育世界)


(圖﹕爛船還有三斤釘的布加勒斯特星隊)

作為本屆歐國盃的黑馬﹐羅馬利亞的表現至今絕對為球迷滿意。面對2006年的世界盃冠亞軍﹐沒有名星在陣的羅馬利亞還能保持不敗﹐實在好難得。而下一仗面對兩度敗於己手的荷蘭﹐在對手早就篤定首名出線下﹐很有可能會像2000年的歐國盃般﹐在死亡之組殺出一條血路。

查羅馬利亞的足球發展較其他的東歐國家要遲。在上世紀冷戰前中期間﹐東歐的足球代表實為蘇聯﹐匈牙利﹐南斯拉夫與及東德等等。羅馬利亞就像今天的波蘭一般﹐只是三流份子。羅國的足運最終能夠雄起﹐實在要歸功於前大獨裁者壽西斯古(Nicolae Ceausescu)。 沒錯﹐就是那位在89年東歐變天後﹐給革命黨們槍斃了的位。

據好些足球雜誌報導﹐壽西斯古本人並非球迷﹐對足球的認識極其有限。他後來動起搞球隊的念頭﹐實在係受了他兩個兒子的影響﹔當然﹐亦和他本人不想事事言聽蘇聯及羅馬利亞國安局有關。

時光回到1970年代的末期﹐布加勒斯特戴拿模(Dinamo)雄霸羅馬利亞足球壇。和其他東歐國家的戴拿模隊一樣﹐羅國的這隊戴拿模亦係有羅國內政部和秘密警察作後台的。有對羅馬利亞認識的朋友﹐都知羅國的黨政軍領導們是面和心不和﹐實情內部天天都有權力鬥爭。大約在此時﹐壽西斯古的兩個兒子建議乃父投放資源搞一支球隊﹐好跟布加勒斯特戴拿模相抗衡。最後﹐“第一家庭”們介入球壇﹐布加勒斯特星隊搖身一變﹐成為一支國內班霸與及歐洲冠軍。

壽西斯古或買﹐或強搶﹐又或下令多名羅國好手轉會到星隊﹐而他的小兒子V. 壽西斯古(Valentin Ceausescu)就成為球會的政委﹐負責思想工作。落戶星隊的球星們很快就成為了特權階級﹐他們獲準擁有樓房汽車﹐與及醇酒美人等等(跟今天的球星全沒分別。) 雖如此﹐V. 壽西斯古實在是一個出色的領導﹐這班球星大爺雖然過著高俅般的生活﹐但在他營營役役的督導下﹐戰鬥能力一直高昂﹐國內聯賽年年奪冠﹐還給他們在1985年幸運地擊敗巴塞隆拿奪得歐冠盃(歐聯前身)的冠軍﹐成為第一亦係唯一奪得歐冠盃的華沙公約國球隊(1989年他們再次殺入決賽但最後不敵AC 米蘭)。有球評家說星隊在國內成功﹐實有賴“第一家庭”的權勢和金錢。然而驕人的國外成績﹐實在令人難以抹殺球員們的功勞。


(短片﹕發生係"六四"之後的羅國革命/起義)

1989年羅馬利亞爆發革命兼兵變﹐羅共政府倒台﹐他和"第一夫人"並旋即被處決。V. 壽西斯古被捕﹐一年後獲釋。然而東西歐在慢慢一體後﹐羅馬利亞的精英球員亦像其他的東歐國家一樣﹐陸續迎向西歐的大小豪門。星隊亦不能倖免﹐但幸運地打擊沒有波蘭或前南斯拉夫諸國般深﹐蓋他們積下來的老本實在深厚﹐因此他們仍然常常在歐聯或歐協亮相﹐並為羅國國家隊提供了不少戰將和統帥。今天的羅國領隊 Victor Piturca﹐正正係V. 壽西斯古主政星隊時的紅人。

然而羅國球壇對星隊的仇視並沒有隨時間而減少﹐很多人一直努力不懈地尋找機會清算星隊。據報星隊被揭發因為打假波﹐將會被重罰失去來季歐聯的參賽資格。罪名係在最後一周聯賽﹐向對手古積大學提供獎金﹐而這在羅馬尼亞係屬於賄賂行為云云。 有多支球隊不滿﹐準備向足總聯署上訴﹐務求星隊要像祖雲達斯般降落乙丙組....總之﹐羅馬尼亞足總一直想搵機會挫磨星隊﹐今回又得手了。

延伸引讀﹕[體育與政治掛勾系列]之「南斯拉夫之死」

16 comments:

收買佬 said...

同場加映﹕奧運是最重要的﹐世界盃也要讓路

中國足協為了操起國奧隊﹐連國家隊踢世界盃的籌劃都要讓路。但黑心點說﹐國奧隊在八月時應亦不會踢出甚麼成績。(全個足協"亂晒龍"﹐點搞ah ﹖)

The Inner Space said...

德國佬由 Ballack 射入罰球,
雋級八強,巔巔兄必定高興到跳起。
但喺 克羅地亞贏咗 波蘭,
德國佬要硬碰葡國鬼。
但德國個件中鋒 高美斯 9號仔
Mario Gómez, 廢柴嚟噃,
三場一球都沒入過!但三場都是正選 starter.
收收兄有留意德甲,可否告知佢咩料,入到國家隊打 Euro 08?

收買佬 said...

高美斯係第二代西班牙移民(籍貫係巴塞隆拿)﹐係德國出世德國大的﹐效力史特嘉﹐
別號Super Mario。他其實係不俗的﹐但季中受傷後開始沉﹔可能他還是太嫩﹐踢歐
聯同歐冠都唔係0甘掂﹐有d 似法國的賓施馬0甘大賽失常。

又﹐原本巴塞打算簽他的﹐但史特嘉要3000萬歐元﹐巴塞即刻走人。:)

The Inner Space said...

多謝收收兄資料,這令我記起英格蘭,有個叫班尼斯嘅前鋒,好似是打利勿浦嘅,
在英甲就也文也武,一到出場代表英格蘭,
參加國際賽事,就腳軟兼夾謝哂。

The Inner Space said...

Euro 08,荷蘭2-0勝了羅馬尼亞,變相放生了意大利。

意大利第二名出線後,極可能對 西班牙,班善唷出名虎頭蛇尾,意大利贏咗西班牙,就大有機會在四強對翻荷蘭。因 D組第二名不出瑞典或俄羅斯,兩隊都應該贏不到今屆的荷蘭。

意大利不會連輸兩次畀荷蘭,意大利絕對有權勝出,夾攞埋冠軍,概AB組出線的好可能喺克羅地亞添,葡萄牙、德國、土耳其都是不穩的隊伍。

Anonymous said...

根本英格蘭就唔掂,唔關班尼斯事既。

意大利冇冠軍相,但淘汰西班牙不難,有得受讓就正囉。

另一邊,葡萄牙在大飛治下係好穩的,我睇可以艱苦地淘汰克羅地亞。

The Inner Space said...

Chaco,

咁大家共識四強會是
荷蘭 對 意大利
葡萄牙 對 克羅地亞

希望能成真喇

我都 好 好 好想決賽是 荷蘭 對 葡萄牙,
唔使睇 意大利 對 克羅地亞 啲悶波,
你講得大飛可以重塑 葡萄牙,咁我再秤佢地多啲喇,不過意大利連輸兩次比荷蘭,可能性有幾多呢?

The Inner Space said...

D組的 西班牙 2-1勝了,
上屆盟主希臘,令到 希臘
三連敗冇哂面,
零勝利,零和局,零分數,可幸得到一個入球,未至到做『四零部隊』。而 俄羅斯就半爆冷的以 2-0,踢了 瑞典出局,將會在八強賽中,對 C組的首名 荷蘭, 兩隊都是快上快落,到時對攻搏鎚,會是幾好睇的比賽,不過 荷蘭可以秤先啲。而 西班牙 對意大利,善唷畀意份佬格食格,意大利應該可以勝出。

Anonymous said...

the i哈哈哈 四強條波纜斷咗添!
睇埋其餘三天睇吓斷幾多條。
好有機會德國再闘克羅地亞復仇,
而意大利再荷蘭再次比較吓腳力。

Anonymous said...

ops!!! 有啲小錯誤,算了吧!

Anonymous said...

葡萄牙的低級後防真係睇到眼突。

明知地獄明燈黃國英、鄭兆聰等的威力仲要同佢地同路,抵我輸錢。

收買佬 said...

colin: 無買到呢場. 心水係意大利贏西班牙.

Anonymous said...

四強上線嘅斷哂纜!
明朝後朝睇埋荷意,
兩隊又點贏到俄西,
下線再冇眼鏡可跌。

Anonymous said...

荷蘭輸1-3畀俄羅斯
我再冇眼鏡跌囉 唉!唉!
睇埋今晚我喺唔喺斷哂四條波纜。

收買佬 said...

俄國佬係唔能夠俾空位佢地走的. ~~

Anonymous said...

預測四強四條波纜斷盡啲眼鏡爛哂嘞!

四天的八強賽爆足四場冷門半冷門

德國勝葡萄牙都算半冷,球隊是民族縮影,即是德國佬有的決心紀律,戰勝了有天份但散漫的西洋鬼。

土耳其勝出克羅地亞就是闘志勝過技術,足球強國南斯拉夫解體後的克羅地亞,先頂入一球,但土耳其嘅闘心未死,即刻入返球,到射點球,連射點球都無闘心點去贏呢?

俄羅斯勝了荷蘭,是教練的功力分冶,軒迪克技術擊倒雲巴士頓,由步處換人變陣,師傅勝了徒弟!

西班牙不是自己勝出,而是意大利自己要輸掉比賽。意粉佬一早求和,到加時更加是九零一戰術,畀佢地求到和嘞,但喺又好似冇預備射十二碼點球咁樣,個個冇嚟信心,西班牙就喺咁贏咗,入咗四強。